धोतीलाई टोपीले किन हेप्छ ?

राजेश विद्रोही

लाहान। इतिहासमै पहिलो पटक होला सत्ता साझेदार दलकै अध्यक्ष र सरकारमै सहभागी मन्त्रीलाई त्यही सरकारको प्रहरी प्रशासनले गिरफ्तार गरेको । त्यो पनि आफ्नो पहिचान झल्कने पहिरन लगाएर साँस्कृतिक दिवस मनाउँदा । यस घटनाले साबित गर्दछ कि नेपालमा मधेसी जनताले खोजेको र चाहेको परिवर्तन आएकै छैन । संघीयता, गणतन्त्र केवल नाम मात्रका छन् । वास्तविक अर्थमा नेपालमा न संघीयता छ, न त गणतन्त्र (लोकतन्त्र) नै । छ त केवल पहाडीयता खस अहंकारवाद, एकात्मक र केन्द्रिकृत महेन्द्र राष्ट्रवादीय मानसिकता । एक भाषा, एक धर्म, एक भेषभुषा, एक संस्कृति र परम्पराको निरन्तरता । अनि त्यही राजा महाराजावाला सामन्तवादी सोच चिन्तन, प्रवृत्ति, मूल्य मान्यता । यसबाट पुष्टि हुन्छ कि नेपाली राज्यव्यवस्थाको केवल मात्रात्मक परिवर्तन भएको छ, गुणात्मक परिवर्तन भएको छैन । गुणात्मक परिवर्तन नभएसम्म नेपालका मधेसी जनता र अन्य शोषित, पीडित, उपेक्षित र उत्पीडित समुदायको वास्तविक अधिकार प्राप्ति सम्भव छैन । न त बहुजातीय, बहुभाषिक, बहुसांस्कृतिक र बहुधार्मिक समाजको सम्मान नै हुन सक्दछ ।