मनोज बनैता
सिरहा । सिरहाको बरियारपट्टी गाउँपालिकामा महाविष्णु यज्ञ हुने भएको छ । बरियारपट्टी-१ नरगी चौकमा आउदो चैत ५ गते देखि श्री सिताराम महाविष्णु यज्ञ प्रारम्भ हुने जानकारी प्राप्त भएको छ । महायज्ञ मूल आयोजक समितिले बुधबार नरगी चौकमा पत्रकार सम्मेलन गरी महायज्ञ आयोजना गरिएको जानकारी दिएको हो।
स्थानीयको आयोजनामा हुनलागेको महायज्ञ हिन्दु धर्मको प्रचार एवं विश्व शान्तिको निम्ति भएको आयोजकले बताए । प्राप्त सुचना अनुसार बरियारपट्टी गा.पाको ५ लाख नगद सहयोग तथा स्थानीयले दिएको चन्दाले महायज्ञ हुन लागेको हो। यज्ञमा करिब ५० लाख खर्च हुने अनुमान गरिएको छ ।
सनातन विधिविज्ञानसहित १५१ कुण्डीय भव्य यज्ञशाला स्थापना गरी महायज्ञ सम्पन्न हुने जानकारी बाबा राम चरित्र दासले दिनुभयो ।
महायज्ञ मूल आयोजक समितिका अध्यक्ष रामबाबु साह सुडीका अनुसार महायज्ञको उद्घाटन प्रदेश २ का आर्थिक मामिला तथा योजना मंत्री माननीय विजय कुमार यादवले गर्नेछ । यज्ञका अध्यक्ष साहका अनुसार चैत ४ गते बिहान ७ बजेदेखि बिहान ११ बजे कलश र विभिन्न झाँकीसहितको कलशयात्रा हुनेछ।
मूल आयोजक समितिका साहले राष्ट्रलाई सक्षम, समर्थ एवं समृद्ध बनाउन पनि महायज्ञ गर्न लागिएको बताए। ‘यो एउटा आध्यात्मिक प्रयोग पनि हो,’ पत्रकार सम्मेलनमा उनले भने, ‘नेपाल तपोभूमि र देवभूमि हो तसर्थ यसलाई पुरा विश्वमा चिनाउन महायज्ञ फलदायी हुनेछ। यो देशको नाम चिनाउने कार्यक्रम हो।’
महायज्ञका कारण सिरहामा आन्तरिक तथा बाह्य पर्यटक आउने विश्वास आफूहरूले लिएको साहको भनाई छ। उनले भने, ‘यो महायज्ञले जिल्लाको पर्यटन विकासमा ठूलो फड्को मार्नेछ।’ महायज्ञमा श्रद्धालु र भक्तालुलाई निःशुल्क खाना र बस्नको व्यवस्था गरिएको पनि अध्यक्ष साहले जनाए।
नेपालसहित छिमेकी भारतबाट महायज्ञमा श्रद्धालुहरूको उपस्थिति हुने महायज्ञ प्रचार प्रसार समितिले जानकारी दिए ।विभिन्न देवीदेवताका १११ माटाका मूर्ति तयार गरिएको महायज्ञस्थलमा रामझुला, रामलिल्ला, रासलिला, मौतका कुवाँ, सांस्कृतिक र साङ्गीतिक कार्यक्रम हुने आयोजक समितिले जनाएको छ ।
